9:30 am
എഴുന്നേറ്റത് ലേശം നേരത്തെ ആയിപ്പോയി... തലേന്ന് കിടക്കുമ്പോ രാത്രി രണ്ടുമണി ആയി... കമ്പനിയില്‍ പോയി പൂക്കളങ്ങള്‍ കാണാമല്ലോ എന്ന് കരുതി എണീറ്റതാണ്... ടീമില്‍ ആകെ ഉള്ള മലയാളി ഞാനാ, അതുകൊണ്ട് മത്സരത്തിനു പങ്കെടുക്കാന്‍ ഏതായാലും ഒക്കില്ല... അത് കണ്ടിട്ടെങ്കിലും പഴയ കോളേജ് ഓര്‍മ്മകള്‍ ഫ്ലാഷ്ബാക്ക് ഇടാം എന്ന് കരുതി... സഹമുറിയനെ അവന്‍ ജീന്‍സ് ഇട്ടാല്‍ സുന്ദരന്‍ ആണെന്നും മറ്റും തെറ്റിദ്ധരിപ്പിച്ച്അവന്‍റെ മുണ്ട് അടിച്ചുമാറി... അതും നല്ലൊരു കടുംനീല ഷര്‍ട്ടും ഇട്ടുകൊണ്ട് 'കിളി'വേട്ടക്ക് ഇറങ്ങി... ഷൂവില്‍കയറാതെ ചെരിപ്പിട്ടു പോകുമ്പോള്‍ തന്നെ ഒരു ആശ്വാസം...
11:45 am
കൂട്ടുകാരോടൊപ്പം പൂക്കളങ്ങളും അതിന് ചുറ്റും ഉള്ള സുന്ദരികളെയും കണ്ടു കുറെ നേരം ചുറ്റി കറങ്ങി... വേഷ്ടിയുടുക്കുമ്പോള്‍ എല്ലാ പെണ്‍കുട്ടികളും സുന്ദരിമാര്‍ ആകുന്നതു പോലെ... ഒരു പൂക്കളത്തിന്റെ അടുത്തായി എഴുതി വച്ച 'ഓണാശംകള്‍' എന്നതിലെ തെറ്റ് ചൂണ്ടിക്കാണിച്ചു കൊടുത്ത് രണ്ടു പൂവധരങ്ങളിലെ 'താങ്ക്സ്‌' മേടിച്ചെടുത്തു... അടുത്തുള്ള മലയാളി മെസ്സിലെ ഓണസദ്യ കൂടി കഴിഞ്ഞപ്പോള്‍ ഓണത്തിന്റെ ഒരു സുഖം ചെറിയ രീതിയില്‍ കിട്ടി...
3:00 pm
ഇന്നു രാത്രി നാട്ടിലേക്ക് വിടും... നാളെ അവളുടെ കല്യാണമാണ്... ഈ വര്‍ഷത്തെ സെപ്റ്റംബര്‍ 11 നു അവള്‍ വിമാനം ഇടിച്ചു കയറ്റാന്‍ പോകുന്നത് എന്‍റെ മനക്കോട്ടയിലേക്കാണ്... സാരമില്ല, താമസിയാതെ പുതിയൊരെണ്ണം കെട്ടിപ്പൊക്കാം... ഇന്നു തന്നെ രണ്ടു പെണ്‍കിടാങ്ങള്‍ എന്നെ നോക്കി ചിരിച്ചതേയുള്ളൂ... കൂട്ടുകാര്‍ക്കെല്ലാംഒരു ഓണക്കവിത മെയില് അയച്ചു...
No comments:
Post a Comment