6:15 am
"വൈല്‍ഡ് വൈല്‍ഡ് വെസ്റ്റ്" സ്റ്റൈലില്‍ ഞാനെന്തോ അതിസാഹസികമായി തോപ്പിയെല്ലാം വെച്ച് ചെയ്യുകയും തുടര്‍ന്ന് ചത്തു പോകുകയും ചെയ്തു... ഒരു സുന്ദരി പെണ്ണും ചുറ്റും കുറെ കൌബോയ് മനുഷ്യരും... പെണ്ണ് എന്‍റെ തല അവളുടെ മടിയില്‍ വെച്ച് എന്‍റെ മുഖത്ത് നോക്കി കരയുന്നു... ചത്തു കഴിഞ്ഞ എന്‍റെ മനസ്സു എന്തോ വൃത്തികെട്ട കാര്യം ചിന്തിക്കുന്നു... ചുറ്റും നിന്ന കൌബോയ് ചേട്ടന്മാര്‍ തൊപ്പി ഊരുന്നു... ഇത്രയും ആയപ്പോള്‍ അലാറം അടിച്ചു... ചത്തു പോകാന്‍ മാത്രം എന്താണ് ഞാന്‍ ചെയ്തതെന്നോ... ഞാന്‍ എങ്ങനെ കൌബോയ് ആയെന്നോ... അതിലുപരി ആ പെണ്‍കുട്ടിക്ക് എന്‍റെ ക്ലാസ്സിലുണ്ടായിരുന്ന ആരുടെയെങ്കിലും ഛായ ഉണ്ടെന്നോ എത്ര ആലോചിച്ചിട്ടും കിട്ടിയില്ല... അവിടവിടെ മങ്ങിയ ചില സീനുകള്‍ മാത്രം ഓര്‍മ്മവരുന്നു... പോട്ട് പുല്ലെന്ന് പറഞ്ഞ്, പോയി പല്ലു തേച്ചു...
7:00 am
പുറത്തിറങ്ങി ഓഫീസിലേക്ക് നടക്കുമ്പോള്‍ അടുത്തുള്ള പണി നടന്നു കൊണ്ടിരിക്കുന്ന കെട്ടിടത്തിന്റെ പണിക്കാര്‍ പുതുതായി ഉണ്ടാക്കിയ ഓലപ്പുരകള്‍ കണ്ടു... അവിടത്തെ പണി കഴിയുന്ന വരെ താല്‍കാലികമായി താമസിക്കാന്‍... കുറച്ച് പേര്‍ എവിടുന്നോ വെള്ളം പിടിച്ചുകൊണ്ട് വരുന്നു... അടുത്തുള്ള സ്കൂളില്‍ പുലര്‍ച്ചെ പ്രാക്ടീസ് ചെയ്യാറുള്ള കരാട്ടെ കുട്ടന്മാരെ ഇന്നു കാണാനില്ല... പിന്‍ഭാഗത്തെ മൈതാനത്തില്‍ ഇന്നും കുറെ പേര്‍ ഷട്ടില്‍ കളിക്കുന്നു... ഞാന്‍ ഇനി എന്നാണാവോ ഷട്ടിലൊക്കെ ഒന്നു കളിക്കുന്നെ... "മിണ്ടാതെ പോയി പണിയെടുക്കെടാ..." എന്ന് സ്വയം ആജ്ഞാപിച്ച് ഓഫീസിലേക്ക് തെറിച്ചു...
No comments:
Post a Comment